Бир мандатли Ленинский сайлов округи бўйича Жогорку Кенеш депутатлигига номзод Дамира Ниёзалиева ички ишлар бўлимига сўроққа чақирилди. Бу ҳақда таҳририятимизга Ниёзалиеванинг ўзи маълум қилди.
29 май куни кечқурун Дамира Ниёзалиеванинг сайлов штабида интернетда тарқалган аудио факти бўйича қўзғатилган жиноят иши асосида тинтув ўтказилди.
29 май куни тушдан кейин овози Дамира Ниёзалиеваникига ўхшаган аёл ва Рома исмли шахс ўртасидаги суҳбат аудиоси тарқалди. Улар Ленин туманидаги депутатлик сайловларида сайловчиларга пора бериш масаласини муҳокама қилган. Ниёзалиеванинг ўзи бу аудиога алоқаси йўқлигини эълон қилиб, бу “монтаж” эканлигини таъкидлади.
28 май куни Бишкекда бир мандатли Ленинский сайлов округи бўйича Жогорку Кенеш депутатига навбатдан ташқари сайловда овоз бериш бўлиб ўтди. Сайлов ахборот тизими маълумотларига кўра, сайловчиларнинг 13,95 фоизи иштирок этган, деярли 125 минг сайловчидан атиги 17 минг 423 нафари овоз берган.
Автоматик равишда сайлов қутиларини ўқиш маълумотларига кўра, номзод Дамира Ниёзалиева (6249) энг кўп овоз тўплади. Марказий сайлов комиссияси овозларни қўлда санаб ўтгандан сўнг сайловнинг якуний натижаларини чиқаради.
Сайловда 29 нафар номзод иштирок этди. Сайловда қатнашиш нияти тўғрисида 49 киши ариза топширган, кейинроқ номзодларнинг бир қисми иштирок этишдан бош тортган.
Бишкекнинг Ленин тумани депутати учун муддатидан олдин сайловлар ушбу округ депутати Жанибек Абировнинг ваколатлари тугаганидан кейин тайинланди. У шу йилнинг март ойида пойтахт ресторанларидан бири яқинидаги муштлашувда иштирок этгани маълум бўлгач, истеъфога чиқиш ҳақида ариза берган.
